Luke 21

Nakwab namuloul avakaein

(Mak 12:41-44)

1Yeisuw itamnow matan, ikines guyawaw mwasanin imulouls Yowbad wanbunatum.

2Wankuyeim mo ikin nakwab nasimav imuloul akweiy toya.

3Ikin ikous, mo ilivan ilana, “Mounid adibakeimiy nakwab mana̱wen namuloul bo itamap wasigeis tasiyas asibabaw. Peinan tasiyas simoney babaw, imulouls ikous, tamkwalan nises; tage mana̱wen namoney misinaka kweiy toya, imuloul ikous, nag aveiyag nises bigimwal kan.”

Igaw bigulekwes Yowbad nabunatum

(Matiw 24:1-2; Mak 13:1-2)

5Gamag mwasanin ilivans Yowbad nabunatum liva̱nen, peinan bo ikawyamis dakul bwana̱bweins, o gamag sisiwa̱youb wasigeis. Yeisuw iligen asilivan, ilana,

6“Youd tasiyas nukukines, igaw kweitan tut mo bigulekwes biyakousis. Nag kweitan dakul bisesuna wakaban.”

Tut kalbaleb ven watinow

(Matiw 24:3-14; Mak 13:3-13)

7Iweis tasiyas, ilansa, “Livan towen nukulivan, avei-tut waseg mo bivag ma̱wan? Ama̱wan bakakakin kakita bo bigulekwes?”

8Ilana, “Awoum gamag bikatidavimiy. Tawaw babaw bisaps yagag waseg bilansa, ‘Yey mtowen yey’; o adok bilansa, ‘Anayam bo neim.’ Awoum kubwa̱kuns wasigeis tasiyas.

9“Igaw bukuliganes bulagan naviy o bulagan kawpwanaw; awoum beivag amipwa̱yat. Sinap tasiyas wanamug, tage tut nakabiyokous wankuyeim.”

10Mo idibakes, ilana, “Ven avakaein bikanaviys wasigeis ven avakaein. King siney nagamag bikanaviys wasigeis kweitan king siney nagamag.

11“O nik binkunik avakaein. O ven mwasanin bikamates moun, o katoun bisap; ven mwasanin gimgilis bimta̱mats. O gamag biwenes singay peinan bikines walba̱lab mulin naman Yowbad.

12“Youd tasiyas kalbaleb tut wanakoug singay, tage watapwan tut gamag biyousimiy biyagageimiy, biyateleimiy sinagog waseg, o bisena̱miy wa̱deil; o peinan gungamag yakamiy bo biyateleimiy wamtes tasiyas king, o takaleiwags kawka̱veks wamtes.

13“Igaw tutan biyateleimiy, mo kwamteles liva̱neig yey.

14“Awoum ninoumiy bibabaw. Awoum ninoumiy kulansa, ‘Ama̱wan bakakatimop asilivan?’

15“Peinan yey basekeimiy amilivan, o amisinap, o bukutawtouns wasigeis tasiyas niyateleimiy. Nag kadilokes bikatimapus amilivan, nag.

16“Timimiyas bisilkodeimiy. E, inmiyas, tuwmiyas, budimiyas, tawlimiyas o veimiyas bisilkodeimiy, mo bikatimateimiy yakamiy mwasanin.

17“Asibabaw bikamliweimiy, peinan gungamag yakamiy.

18“Tage nag biyagageimiy. Nag bigutus walitanok kunumiy.

19“Kukin bukwaptuleimiy mo bukuyamoveimiy.

Bo bigulekwes Yelusalem

(Matiw 24:15-21; Mak 13:14-19)

20“Tage igaw bukukines takanaviy asibod babaw bidiliwunis miven Yelusalem, mo bukukwakins kakita bigulekwes.

21“Yakamiy magat bukusikes Yudiy, kadiloka kusawls kuneis wa̱koy; o yakamiy waven kadiloka kuneis wanawoud; o yakamiy wa̱bag awoum kumeis waven.

22“Tut towen waseg Yowbad bo bimop gamag asisinap, mamagina bo bikamat sinap babaw nilivnek Bukitab waseg.

23“Tut towen siyas takakuda̱poms bilivatus kalbaleb, o tasiyas nisasus nitsiyas. Peinan ven watinow gimgilis abes singay bigeg, o Yowbad bikawkunes gamag tasiyas.

24“Gamag tasiyas bimta̱mats naviy waseg; o tobwag gamag bimeis bigulekwes ven towen Yelusalem, bitokes min-Yelusalem binawes ven babaw wasigeis; o tobwag gamag tasiyas mo bivva̱nis Yelusalem pwepway-nen ee... tobwag gamag tasiyas situt mo biyakous.

Yeisuw beiyum beim

(Matiw 24:29-31; Mak 13:24-27)

25“Gamag bikines mulin naman Yowbad bivag ka̱las waseg, o tibukon waseg, o wutun wasigeis, biyagages. O ven watinow, kaysay singay bika̱wot avakaein, mapuna ven babaw gimgilis biliganes, beivag ninous babaw. Ta-ma̱wan bikakins, bikatinabwes.

26“Tawaw bo bisoumats, aspwa̱yat, bininuways ven watinow bo biyageg. Peinan liba̱lab tatonen bo bigulek.

27“Ikous, mo bukukineigs Gimgilitoun yey bo bam, lov waseg, son guntawtoun o yakawanag avakaein.

28“Igaw bisilamaws youd tasiyas, bweina bukutamnawes kayoumiy, bukukines takatinabweimiy bo beim.”

Yowbad nakaleiwag bisap

(Matiw 24:32-35; Mak 13:28-31)

29Nakabebay kweitan isekes mamagina: “Kukines yaveinun siney amweilok babaw, biya̱sus yageivein kweivaw mo bukukwakins wuwal bo beim.

31“E, ma̱wan bukukines sinap tasiyas bisipsaps, mo bukukwakins Yowbad nakaleiwag bo bisap.

32“Mounid adibakeimiy tut towen gimgilis bisesus ee... mo sinap tasiyas bisipsaps.

33“Liba̱lab son ven watinow beiyakous, tage agulivan nag biyakous, nag.

Kuvna̱seimiy, kukwayamats

34“Kuvna̱seimiy. Awoum ge ninoumiy bibula̱bol peinan kuninuways kaeimiy, o amiyoubwein, o amiwiskiy, o youd katanok katanok ven watinow waseg, mo Yowbad anayam bisibluteimiy, mamagina sik bikwaneimiy.

35“Peinan bo bisiblutes gamag ven watinow wadaban pwepway.

36“Tage yakamiy, kadiloka kukwaymates tut babaw, kuninitougs va̱gan Yowbad bilabeimiy bikimtuweimiy, mata ge bikwaneimiy youd siyas kalbaleb, wankuyeim mo bukutamanaws yey Gimgilitoun yey wamatag.”

Ikatimlakes Yowbad wanbunatum

37Yam katanok katanok ikatimlakes gamag Yowbad wanbunatum, o boug waseg inoun in wa̱koy yagan Oliv, imasis.

38Ga̱boug katanok katanok gamag babaw mo ikattuyouns imimeis Yowbad wanbunatum va̱gan biliganes aygan.